Зохиолч орчуулагч Дя.Алтанхуягын дурсгалд...

Саяхандаа нэг блог билүү нэг сонины нийтлэл уншиж байгаад " уулзаад байгаа мөртлөө санаанд хоногшдоггүй хүмүүс байдаг ,харин ганц хоёрхон удаа уулзсан мөртлөө санаанаас гардаггүй хүмүүс байдаг " гэсэн үг олж хараад нээрээ маш үнэн үг шүү гэж бодож байж билээ.Тийм нэг санаанд хоногшиж дурсагдаж байдаг нэг хүний тухай бичмээр санагдлаа.Надаас нилээд хэд ах мөртлөө бага залуу гэж гололгүй надтай найзалж байсан нэрт орчуулагч зохиолч Дя.Алтанхуягын өгүүлж байсан энгийн бөгөөд их мэдлэг шингэсэн яриануудыг одоо дурсахад их сайхан байна.Их мөрөн дөлгөөн Их хүн даруухан гэж нэг үг байдаг даа.Тэр үг л түүнд их тохирмоор хүн байсан даа.Бид хоёр нэг их уулзаж чаддаггүй байсан л даа.Түүний ажлын боломж бололцоо таараад хааяа нэг уулзаад ахаасаа их л юм асууж сонирхдог тэрүүнд ерөөсөө тээршээж ундууцалгүй уйгагүй яриад суудаг байсан нь түүний хүнд их хүндэтгэлтэй ханддаг байсан хүнлэг чанартай холбоотой.Их сонирхолтой юм ярьдаг бас их энгийн дөлгөөн болохоор нь уулзахыг тэсэж ядан хүлээдэг байсан юм.Бидний нэг нэгнийгээ мэдэх үед тэрээр армийн улс төрийн газар офицер байсан бөгөөд цэргийн ангиар явах ажил ихтэй байсан болохоор заваар ч бага байсан юм Дараа нь.90 оод оны эхээр хүн болгон наймаа гээд хошуурч байхад Алтанхуяг ах нэгэн өдөр тутмын сонины эрхлэгч хийгээд явж байсан санагдана. .Би нэг удаа их дэлгүүр орох гээд явж байгаад хүмүүс нэг газар овоороод байхаар нь яваад очтол Алтанхуяг ах маань тэр үед ид гарч байсан Италийн олон ангит Наймаалж гээд киноны номыг орчуулсан байснаа хэвлүүлээд өөрөө зарж байсантай тааралдаж билээ.Хүмүүс шавчихсан түүнээс гарын үсгийг нь аваад их л завгүй харагдаж байсан болохоор би уулзаж чадалгүй яваад өгсөн юм.Тэр бол түүнийг харсан хамгийн сүүлийн тохиолдол байсныг би мэдээгүй юм.Нэг их удаагүй хэдэн сарын дараа Багшийн дээдийн дэргэдүүр өнгөрч байтал нэг зарлалын цаас наасан байсныг очиж үзтэл орчуулагч зохиолч Дя.Алтанхуягыг амь насыг нь зэрлэгээр бүрэлгээд байсныг олсон бөгөөд гэмт хэргийг харсан үзсэн гэрч байвал цагдаа дээр ирнэ үү гэсэн зар байхыг хараад би хэдэн өдөр л шоконд орж билээ.Үнэхээр их харамсаж билээ.Одоо амьд байсан бол их л юм бүтээж санаачлах хүн байсан даа.Тэр үед нь түүнийг хороосон гэмт хэрэгтнүүдийг эрж хайж байна гээд л байдаг байсан сүүлд сураг тасарсан одоо яасан юм бол бүү мэд .Ямартай ч түүнийг одоо болтол нэхэн санаж дурсаж байгаа хүмүүс олон байдаг гэдэгт эргэлзэхгүй байна.Орчлонгоос хүний сайн нь түрүүлээд явчихдаг гачлантай хорвоо шүү.Богинохон ч гэлээ хугацаанд уулзаж байхдаа гэгээн сайхан дурсамж үлдээсэн тандаа үгэн зул өргөе өө.